दशैं विदामा बन्द भएका सरकारी कार्यालय खुले, पुरानै लयमा फर्किए सहर

तिलोत्तमा सिटी,३१ असोज २०७८। दशैंको विदा सकिएसँगै विभिन्न जिल्लाहरुमा चहलपहल बढेको छ । बन्द भएका सरकारी कार्यालयहरु पनि आजबाट खुलेका छन्।दशैं मनाउन गाउँघर गएकाहरु बुटवल भैरहवा भित्रिने क्रम जारी छ । लुम्बिनीका बुटवल भैरहवा नेपालगंज कपिलबस्तु नवलपरासी लगायतका नाकाहरुमा दशै मनाएर सहर फर्कनेहरुको भिड बढेको देखिन्छ । मानिसहरूको भिडभाडले बजार पुरानै लयमा फर्किन थालेको आभास मिल्छ।

बुटवल बसपार्क भैरहवा बेलहिया नाकामा आइतबारबाटै चहलपहल बढेको देखिएको थियो । सडकहरुमा गाडीको संख्या पनि बाक्लिंदै गएको थियो । सवारी साधनको चहलपहल बढे पनि सडकमा जाम हुने गरी चाप भने अझै नभइसकेको ट्राफिक प्रहरीले जनाएको छ ।यद्यपि आज टीकाको तेस्रो दिन पनि मान्यजन तथा आफन्तबाट टीका थाप्ने र आशिर्वाद लिने क्रम चलिरहेको छ । टीकाको दिन आफन्त तथा मान्यजनबाट टीका लगाउन नभ्याएकाहरुले कोजाग्रत पूर्णिमाका दिनसम्म टीका थाप्ने प्रचलन छ ।