मणिग्राममा तिलोत्तमा नगरपालिकाको अनुगमनमा तिब्रता,अखाद्य मासु बेच्नेलाई कारबाही

तिलोत्तमा नगरपालिकाले आज नगरका पाँच वटा मासु पसल अनुगमन गरेको छ । भलबारदेखि मणिग्रामसम्मका पाँच वटा मासु पसलमा नगरपालिकाको टीमले अनुगमन गरेको हो । नगर उपप्रमुख जागेश्वरी चौधरीको नेतृत्वमा रहेको अनुगमन टोलीमा विभिन्न व्यवसायिक संघ संगठनका प्रतिनिधि, कर्मचारी, नगर प्रहरी तथा सञ्चारकर्मीहरुको सहभागिता रहेको थियो ।

अनुगमनका क्रममा कतिपय पसलहरुले सरसफाइको न्यूनतम मापदण्ड समेत पालना गरेको भेटिएपछि उनीहरुलाई सचेत गराइएको अनुगमन टोलीले जनाएको छ । सोही क्रममा टोलीले मणिग्रामस्थित कुरैसी मासु पसलबाट २७ किलो अस्वस्थकर मासु जफत गरी तत्काल नष्ट समेत गरेको छ । अनुगमन टोली संयोजक तथा नगर उपप्रमुख चौधरीले उपभोक्ताको स्वास्थ्यमाथि खेलवाड गर्ने छुट कसैलाई नभएको बताउँदै नागरिकले मूल्य तिरेपछि स्वस्थकर मासु प्रयोग गर्न पाउनुपर्छ भन्ने मान्यताको आधारमा बजार अनुगमन गरिएको बताउनुभयो ।

अनुगमनमा सहभागी तिलोत्तमा व्यापार संघका अध्यक्ष प्रेम जिएमले कुरैसी मासु पसलमा खान अयोग्य मासु भेटिएकाले खाल्टोमा पुरेर नष्ट गरिएको स्पष्ट पार्नुभयो । उहाँले मासुको खपत गर्ने ग्राहक र छिमेकीहरुले पनि त्यसबारे चनाखो हुनु पर्ने र खाली अनुगमनकै भर पर्ने प्रबृत्ति त्याग्नुपर्ने बताउनुभयो।  जनस्वास्थ्यसँग प्रत्यक्ष जोडिएको उपभोग्य वस्तुको बिक्री वितरणलाई व्यवस्थित र मापदण्डभित्र राख्न आगामी दिनमा पनि अनुगमनलाई निरन्तरता दिइने नगरपालिकाले जनाएको छ । तिलोत्तमा नगरपालिकाले पछिल्लो समय दैनिक उपभोग्य बस्तुहरुको सन्दर्भमा बजार अनुगमनलाई तीव्र बनाएको छ । यसअघि नगरपालिकाले दुग्ध पसलहरुको अनुमन गरी ८ वटालाई कारवाही गरेको थियो ।