कर्मचारी युनियन रुपन्देहीले एक हजार सदस्यको बीमा गर्‍यो

तिलोत्तमा सिटी,फागुन १४ गते २०७८।नेपाल निजामती कर्मचारी युनियन रुपन्देहीले आफ्ना सदस्यहरुको दुर्घटना बीमा गरेको छ  ।  सगरमाथा इन्स्योरेन्स कम्पनीबीचमा युनियनले बुधबार बुटवलमा एक कार्यक्रमकाबीच १ हजार ३८ सदस्यहरुको बीमा सम्झौता गरेको हो । 

युनियन रुपन्देहीका अध्यक्ष चक्रपाणी पाण्डेय र सगरमाथा इन्स्योरेन्स कम्पनी बुटवल शाखाका प्रमुख रोमनाथ ढकालबीच बीमा सम्झौता गरिएको हो ।  नेपाल निजामती कर्मचारी युनियका केन्द्रीय उपाध्यक्ष मदन गौतमको प्रमुख आतिथ्यतामा कार्यक्रमको आयोजना गरिएको हो । सो अवसरमा बोल्दै केन्द्रीय उपाध्यक्ष गौतमले जिल्ला कार्यसमिति रुपन्देहीले आफ्ना सदस्यहरुको बीमा गरेर फरक खालको तर उदाहरणीय कार्य गरेको बताए । उनले दुर्घटनाबाट हुने क्षतिको न्यूनीकरणको लागि बीमाको आवश्यकता रहेकोमा जोड दिए ।  

नेपाल निजामती कर्मचारी युनियन जिल्ला अध्यक्ष चक्रपाणी पाण्डेयले निर्वाचित भएर आएपछि युनियनको पहिलो बैठकले सदस्यहरुको बीमा गर्ने निर्णय गरे बमोजिम बीमा गरिएको जानकारी दिए  । उनले संगठन विस्तार गर्दै सदस्यहरुको सेवासुविधा तथा हकहितको लागि युनियनले काम गर्दै आएको बताए  ।त्यस्तै जिल्ला उपाध्यक्ष टेकराज पन्थीले जिल्लामा रहेका १ हजार ३८ सदस्यहरुको १ लाख बराबरको दुर्घटना बिमा गरिएको जानकारी दिए । सगरमाथा इन्स्योरेन्स बुटवलका शाखा प्रमुख रोमथनाथ ढकालले दुर्घटनाबाट अंगभग वा मृत्यु भएमा बीमाले एकलाख रकम भुक्तानी दिने जानकारी दिए  । 

कार्यक्रममा केन्द्रीय सचिव गणेश भण्डारी, केन्द्रीय सदस्य इन्दु शर्मा, नेपाल पत्रकार महासंघ लुम्बिनी प्रदेशका महासचिव विक्रम खड्का, सिविए उपाध्यक्ष भोजराज न्यौपाने, सह-सचिव पदम आचार्य लगायतले बोलेका थिए ।