जाडो बढेपछि यस्तो छ,तिलोत्तमाका स्वास्थ्यकर्मीको सुझाव

तिलोत्तमा,मङ्सिर ११ गते। अहिलेको बर्ष मङ्सिर महिना लागेपछि चिसो ह्वात्तै बढेको छ। तराइका भैरहवा, तिलोत्तमा, देवदह, बुटवल लगायतका प्रमुख शहरहरुमा चिसो एकदमै बढेपछि स्वास्थ्यकर्मीहरुले घर परिवारका लागि सतर्क रहन र चिसो बाट बच्न आग्रह गरेका छन्। तिलोत्तामाका स्वास्थ्य शाखा प्रमुख ज्ञान प्रसाद पौडेलका अनुसार चिसो महिना लागेपछि रुघा खोकी निमोनिया जस्ता रोगले सताउने भएकोले यस प्रति ख्याल गर्न सबै नगराबासीमा आग्रह गरेका छन्।एक्कासी बढेको जाडोको बेला बृद्ध बृद्धा, सुत्केरी महिला र बालबालिकालाई धेरै समस्या हुने गरेको पौडेलले बताएका छन् । तापक्रम घट्दै गइ बढेको चिसोका कारण बालबालिका, बृद्धबृद्धालाई अझ बढी समस्या हुने गरेको उनको भनाई छ । 

जाडो बढेसंगै मानिसको शरीरमा विभिन्न स्वास्थ्य समस्या देखिने गरेको तिलोत्तमाका जनस्वाथ्य निरिक्षक केशव भट्टराईले बताए । उनले भने–‘विशेष गरेर बालबालिका र बृद्धबृद्धालाई चिसोले छिट्टै समात्ने भएकाले उनीहरुलाई न्यानो पारेर राख्नु पर्दछ ।’ चिसोले रुघाखोकी, दम, निमोनिया, कोल्ड डायरिया जस्ता स्वास्थ्य समस्या हुने गरेको चिकित्सकको भनाइ छ ।चिसो याममा बाक्लो लुगा लगाउन, अनावश्यक रुपमा बाहिर नघुम्न र तातो, झोलिलो पदार्थ पर्याप्त मात्रामा खानका लागि भट्टराईले आग्रह गरेका छन् । चिसोले बालबािलका र बृद्धबृद्धालाईमात्रै नभइ वयस्कलाईसमेत समस्या गर्ने भएकाले चिसोबाट बच्ने उपाय अपनाउनु पर्ने उनको भनाइ छ।

चिसो ह्वात्तै बढेपछि तराईको जनजीवन प्रभावित भएको छ । भैरहवासहित तराईमा सुरु भएको शीतलहरसंगै बढको चिसोको कारण जनजीवन प्रभावित भएको हो । हुस्सु र शीतलहरका कारण कठ्याङ्ग्रिने जाडो भएको छ । दुई दिनदेखि घामसमेत नलागेपछि जाडो झनै बढ्दै गएको छ ।