बुटवल—नारायणगढ सडक यथाशीघ्र निर्माण सम्पन्न गर्न सांसद घिमिरेको माग

तिलोत्तमा  सिटी । बैशाख २७ गते । प्रतिनिधिसभा सदस्य बासुदेव घिमिरेले बुटवल—नारायणगढ सडकयथाशीघ्र निर्माण सम्पन्न गराउन सरकारको ध्यानाकर्षण गराउनु भएको छ । मंगलबार प्रतिनिधिसभा बैठकको शून्य समयमा बोल्दै सांसद घिमिरेले समयमैं निर्माण सम्पन्न नहुँदा धुलोले स्थानीय बासिन्दा र यात्रुहरुको स्वास्थ्यमा गम्भीर असर परेको उल्लेख गर्नुभयो । सडक निर्माणमा ढिलाइ हुँदा यात्रुहरू अत्यन्त कष्ठकर यात्रा गर्न बाध्य भएको बताउँदै सांसद घिमिरेले सडकको हैसियत बिग्रिँदा ३ घण्टामा यात्रा गर्न  सकिने सडक यात्राका लागि अहिले ७ घण्टासम्म लाग्ने गरेको बताउनुभयो । बिग्रिएको सडक भएकोले सवारीसाधनले पेट्रोलियम पदार्थ बढी खपत गर्ने  र सवारीसाधन बिग्रिँदा प्रत्यक्ष÷अप्रत्यक्ष रुपमा करोडौं रकम विदेशिएको सांसद घिमिरेको भनाइ छ ।

पूर्वपश्चिम राजमार्गको सबैभन्दा व्यस्त बुटवल—नारायणगढ सडकखण्डमा दैनिक साना—ठूला गरि  ५० हजारभन्दा बढी सवारीसाधन गुड्छन् । गत साउन महिनाभित्र निर्माण सक्ने गरी चाइना स्टेट कन्स्ट्रक्सन इन्जिनियरिङ कर्पोरेसनले २०७५ माघ २४ गते यो सडक विस्तारको ठेक्का सम्झौता गरेको थियो । तर, सम्झौताको चार वर्ष बितिसक्दासम्म पनि  ११४ किलोमिटरको यो सडकको ३० प्रतिशत काम मात्र पूरा भएको छ ।