माइतीघरमा महावीर पुनको धर्ना कायमै, राति सडकमै बास, पुनका जायज माग पूरा गर्न सांसद बासुदेव घिमिरेको माग

तिलोत्तमा सिटी १६ बैशाख २०८०। राष्ट्रिय आविष्कार केन्द्रका संस्थापक एवं वैज्ञानिक महावीर पुनले आफ्नो माग पूरा नभएसम्म माइतीघरमा धर्ना नछोड्ने बताउनुभएको छ । हिजोदेखि धर्ना थालेका उहाँले माइतीघर चोकको सडकमै रात बिताउनुभएको छ । गएराति आफू धर्नास्थलमै सुतेको र आफूलाई १५÷२० जना साथीहरुले साथ दिएको उहाँले बताउनुभयो । अनुसन्धान, नवप्रवर्तन र आविष्कारमा विकास बजेटको एक प्रतिशत रकम छुट्याउनुपर्ने लगायतका आफ्नो माग पूरा नभएसम्म धर्ना कायमै  रहने उहाँको भनाइ छ । 

उहाँले अर्थतन्त्र सुधार गरी युवा जनशक्ति विदेश पलायन हुनबाट रोक्न सरकारले सहज वातावरण सिर्जना गर्नुपर्ने माग गर्नुभएको छ । अनुसन्धान, नवप्रवर्तन र आविष्कार प्रवर्द्धन, सञ्चालन तथा खरिद ऐन बनाउन तथा विकास बजेटको कम्तीमा एक प्रतिशत यस क्षेत्रमा छुट्याउन उहाँको माग छ । माग पूरा गराउनको लागि सरकारलाई दबाब दिन हिजोदेखि माइतीघरमा धर्ना सुरु गरेका वैज्ञानिक महावीर पुनलाई युवाहरुले साथ दिएका छन् ।

यसैबीच प्रतिनिधिसभा सदस्य बासुदेव घिमिरेले,  राष्ट्रिय आविष्कार केन्द्रका सभापति तथा म्यागसेसे अवार्ड विजेता महावीर पुनले राखेका मागप्रति गम्भीर बन्न सरकारको ध्यानाकर्षण गराउनु भएको छ । प्रतिनिधिसभाको शुक्रबारको आकश्मिक समयमा बोल्दै सांसद घिमिरेले महावीर पुन जस्ता अनुसन्धानमा लागिपरेका व्यक्तिलाई प्रोत्साहन गर्ने वातावरण निर्माणमा लाग्न सरकारको ध्यानाकर्षण गराउनु भएको हो । पुनले अनुसन्धानको क्षेत्रमा गरेको योगदान आफैंमा प्रशंसनीय रहेको उल्लेख गर्दैै सांसद घिमिरेले पुनले राखेका जायज माग पूरा गराउन सरकार तत्पर हुनुपर्ने बताउनुभयो ।