आर्यनको ‘सायरा’ लाई बिश्वब्यापी रिलिज गर्ने

तिलोत्तमा, १५ मंसिर २०७९।नेपाली भाषामा निर्माण भएर हिन्दीमा डब हुन लागेको फिल्म ‘सायरा’ विश्वव्यापी रिलिज हुने भएको छ । हालै फिल्मका प्रस्तुतकर्ता रघु परियार र भारतीय कम्पनी पावनी फिल्म्सका प्रबन्ध निर्देशक विशाल चौधरीबीच विश्वव्यापी रिलिजको बारेमा सम्झौता भयो । सम्झौतापछि परियारले भने, ‘पावनी फिल्मस्ले विश्वभर फिल्मलाई रिलिज र प्रमोशन गर्नेछ । यसले हामीलाई हौसला थपेको छ ।’

पावनी फिल्मस्का प्रबन्ध निर्देशक चौधरीले नेपाली फिल्मसँग सहकार्य गर्न पाएकोमा खुसी व्यक्त गरे । ‘नेपाली फिल्मको मेकिङ अनुसार अझै विश्वमा बजार पाउन सकेको छैन । यसैले हामी नेपाली फिल्मलाई विश्वभर प्रदर्शन गर्न आएका छौँ । नेपाली-इण्डो फिल्म भएकाले हामीले धेरै आशा राखेका छौँ’, चौधरीले भने । भारतीय निर्देशक विशाल देसाईले यो फिल्मको निर्देशन गर्नेछन् ।

फिल्ममा नेपाल र भारत दुवै देशका कलाकारहरुको अभिनय रहनेछ । नेपालबाट सुपरस्टार आर्यन सिग्देल र मोडल तथा डान्सर कविता नेपालीको मुख्य भूमिका रहनेछ भने भारतबाट अभिनेत्री सुफिया सिद्दिकीको अभिनय रहनेछ । हालै फिल्ममा भारतीय अभिनेता तथा मोडल धानिष सोनी पनि भित्रिएका छन् । फिल्मको ९० प्रतिशत अष्ट्रेलिया र १० प्रतिशत नेपालमा छायांकन हुनेछ ।

पुस्कर झा निर्माता र काजीमान आत्रेय कार्यकारी निर्माता रहेको फिल्मको निर्माणमा डीबीआर मिडिया एण्ड मुभिज र आइविल प्रोडक्सन अष्ट्रेलियाले सहकार्य गर्नेछन् । फिल्मको कथा प्रस्तुतकर्ता परियारको हो । उनले लभस्टोरी कथामा पूर्ण कमर्शियल फिल्म बनाउन लागेको बताए । आर्यन सिग्देल स्टारर फिल्म ‘डिसेम्बर फल्स’ प्रदर्शनमा आएपछि ‘सायरा’ छायांकनमा निस्कनेछ ।