प्यारा युवक -८

 काशीनाथ मिश्रित 

२०७८ फागुन १५ , तिलोत्तमा सिटी । 

सामन्तीको मुकुट चुडियो छन् जरा यत्रतत्र ।

गर्दै होला नव किसिमले देश खाने षड्यन्त्र ।।

खोस्रीखोस्री अब सब जरा फ्याँकिनै पर्छ क्यार ।

मेरा प्यारा युवक बलिया देशका कर्णधार ।।

आँखा गाडी किन दिनदिनै हेर्छ त्यो अम्रिकाले ।

गिद्धे दृष्टि दिइ किन सिमा मिच्छ त्यो इण्डियाले?

सोच्ने बेला नबन लहडी लाग मुठ्ठी कसेर ।

मेरा प्यारा युवक बलिया देशका कर्णधार ।।

तिम्ले आँटे हिमशिखरमा फुल्छ लालीगुराँस ।

तिम्ले ढाटे मुलुक सहजै हुन्छ चाँडै विनाश ।

नेपालीको अझ रहिरह्यो फेर रुन्चे मुहार ।

मेरा प्यारा युवक बलिया देशका कर्णधार ।।

हाम्रो ठूलो जनबल उता खाडिमा खेर जाने ।

बन्ला वातावरण कहिले चाकडीमा नजाने ।

कर्णालीको जल सरि गयो शक्ति तिम्रो अपार ।

मेरो प्यारा युवक बलिया देशका कर्णधार ।।

नेपालीको हृदय तिमिले छाम्नु पर्ने छ साथी ।

जिम्मा तिम्रै यस मुलुकको राख है काँधमाथि ।

फेर्नै पर्ने कुचलन यहाँ देख्छु कैयौं हजार ।

मेरो प्यारा युवक बलिया देशका कर्णधार ।।