लुम्बिनी प्रदेशका मुख्यमन्त्रीको राजीनामा स्विकृत

तिलोत्तमा सिटी,२७ साउन २०७८,बुधबार। लुम्बिनी प्रदेशका प्रदेश प्रमुख अमिक शेरचनले प्रदेश सरकारका मुख्यमन्त्री शंकर पोखरेलको राजीनामा स्वीकृत गरेका छन् । प्रदेशसभामा मुख्यमन्त्री पोखरेलविरुद्ध प्रदेशसभामा दायर भएको अविश्वास प्रस्तावमाथि छलफल र निर्णय हुने कार्यतालिकालाई छल्दै उनले प्रदेश प्रमुख समक्ष राजीनामा बुझाएका थिए । यस अघि बैशाख १९ गते पनि उनीमाथि अविश्वासको प्रस्तावमाथि छलफल हुने दिनकै बिहान राजीनामा दिएर पुनः नियुक्ति लिएका थिए ।

मुख्यमन्त्रीले बुझाएको राजीनामा स्वीकृत गरिएको प्रदेश प्रमुखको कार्यालयले विज्ञप्ति मार्फत जानकारी दिएको छ । अर्को मन्त्रिपरिषद गठन नहुँदा सम्म पोखरेल नेतृत्वकै मन्त्रिपरिषदबाट कार्यभार सम्हाल्ने गरि प्रदेश प्रमुखले तोकेको प्रदेश प्रमुख कार्यालयले प्रकाशित विज्ञप्तिमा उल्लेख छ । प्रदेश प्रमुखको कार्यालयले सोही ब्यहोराको पत्र प्रदेशसभामा पनि पठाएको छ ।

एमाले नेता पोखरेल २०७४ फागुन ३ गते पहिलोपटक लुम्बिनी प्रदेशको मुख्यमन्त्री नियुक्त भएका थिए । गत वैशाखदेखि विपक्षी गठबन्धनले शंकर पोखरेललाई हटाउनका लागि दवाव दिँदै आएका थिए । विपक्षी गठबन्धनले नेकपा माओवादीका कुलप्रसाद केसीलाई मुख्यमन्त्री बनाउने प्रस्ताव गरेका छन् ।