तिलोत्तमामा बिद्यालयका नर्स कोभिड अस्पतालमा, मेयर उपमेयरको गाडी एम्बुलेन्स बनाइयो

रुपन्देहीको तिलोत्तमा नगरपालिकामा कार्यरत बिद्यालयका नर्स हरुलाई अस्थायी कोभिड अस्पताल र कोरोना स्वास्थ्य अभियानमा लगाउने निर्णय संगै नगरका मेयर बासुदेव घिमिरे र उपमेयर जागेश्वर देवी चौधरी चढ्ने स्कर्पियोलाइ एम्बुलेन्स बनाउने निर्णय भएको छ।  कोभिडको संख्यामा ह्वात्तै बृद्दी भएपछी जनताको ज्यान भन्दा ठुलो कुरा केहि नरहेको भन्दै सो निर्णय गरिएको  मेयर बासुदेव घिमिरेले बताए।

नगरपालिकाभित्रै दिनप्रतिदिन कोरोना संक्रमितको संख्या थपिदै जाँदा संक्रमितलाई उपचारको लागि अस्पताल लैजान एम्बुलेन्सको अभाव हुन थालेपछि यस्तो निर्णय गरिएको हो। मेयर बासुदेव घिमिरे लु १ झ ३६० नम्बरको र उपमेयर जगेश्वरीदेवी चौधरीले ३२६ नम्बरको स्कार्पियो गाडी प्रयोग गर्दै आएका छन्।‘नागरिकहरु एम्बुलेन्स नपाएर घरमै छटपटाइरहँदा उहाँहरुकै करबाट किनिएको सरकारी गाडी चढेर हिँड्न हामीलाई नैतिकताले दिएन,’ उनले भने। उक्त गाडीमा सिट र अक्सिजन सिलिण्डर व्यवस्थापन भइरहेको र आजदेखि नै एम्बुलेन्सको रुपमा प्रयोगमा ल्याइँने उनले बताए।

साथै नगरपालिकाले यसअघि वडा नम्बर २ शंकरनगर बनबाटिकामा रहेको स्वास्थ्य चौकीलाई अन्यत्र व्यवस्थापन गरेर अक्सिजन सहितको आइसोलेसन अस्पतालको रुपमा सञ्चालनमा ल्याइसकेको छ।दैनिक करिब दुई सय जनासम्म संक्रमित थपिँदै गइरहेको तिलोत्तमामा रुपन्देहीको बुटवल उपमहानगरपछि सबैभन्दा धेरै संक्रमित छन्। नगरपालिकामा बिद्यालयका नर्स समेत परिचालन गरि स्वास्थ्य अवस्था बुझ्न र कोरोना संक्रमितहरुका लागि औषधि परामर्श दिन खटाइएको छ।