फिल्म र गायनमा फ्लप,राजनितिमा प्रकाश सपुत

बुटवल। भनिन्छ, ‘एकसाथ दुईवटा डुङ्गामा खुट्टा राखेर यात्रा गर्नु भनेको दुर्घटना निम्त्याउनु हो ।’ गायक तथा अभिनेता प्रकाश सपूतले पनि यही दुस्साहस गर्दा करिअरमा ठूलो उतारचढाव भोग्नु परेको छ । गायनमा लोभलाग्दो उडान भरिरहँदा उनले ‘परदेशी २’बाट फिल्ममा डेब्यु गरेका थिए । यसबाट उनले सफलता पनि पाए । उनको दोस्रो फिल्म ‘पूर्णबहादुरको सारंगी’ले त इतिहास नै रच्यो ।

तर, गत वर्ष एमालेका अध्यक्ष केपी शर्मा ओलीको प्रशंसा गरेपछि उनले अभिनय र गायनमा निरन्तर असफलता भोगिरहेका छन् । उनी आफैंले निर्देशन र अभिनय गरेको फिल्म ‘वसन्त’ नराम्ररी डुब्यो । उनका लागि यस वर्ष अझ निराशाजनक बनेको छ । ५ महिनाअघि सार्वजनिक भएको उनको गीत ‘नाइँ भनेसी नाइँ’ ठ्याम्मै चलेन । उनका फिल्महरू पनि श्रृंखलाबद्ध रुपमा फ्लप भए ।यस वर्ष उनका चार फिल्म ‘हरिबहादुरको जुत्ता’, ‘माइतीघर’, ‘सोल्टिनी’ र ‘मिरमिरे’ प्रदर्शन भइसकेका छन् । यसमध्ये ‘माइतीघर’ र ‘हरिबहादुरको जुत्ता’ले ४ करोडको आँकडा पार गरे पनि लगानी सुरक्षित गर्न सकेनन् । ‘सोल्टिनी’को अवस्था त हरिविजोग नै रह्यो । यसले ३० लाख पनि कमाएन । यतिबेला प्रदर्शन भइरहेको ‘मिरमिरे’को व्यापार पनि ४० लाख आसपासमा अड्किएको छ ।

एक वर्षमै चारवटा फिल्म फ्लप भएपछि उनीदेखि निर्माताहरू तर्किन थालेका छन् । यसैले हुनसक्छ, उनले पनि नयाँ बाटो रोजेका छन् । राष्ट्रिय स्वतन्त्र पार्टी (रास्वपा)बाट राजनीतिमा होमिँदै उनी समानुपातिक उम्मेदवार बनेका छन् । उनी सांसद बन्ने निश्चित प्रायः देखिन्छ । जे होस्, प्रकाशको भाग्यलाई चाहिँ मान्नैपर्छ । एकातिर नभए अर्कोतिर उनका लागि ढोका खुला भइसकेको हुन्छ ।