तिलोत्तमा,असोज २० गते। दीप ज्योति बचत तथा ऋण सहकारी संस्था लिमिटेडको १७औं वार्षिक साधारण सभा सम्पन्न भएको छ । शनिबार तिलोत्तमाको बनबाटिकामा भएको सभाले आर्थिक वर्ष ०७९/८० असार मसान्त सम्मको संस्थाको आर्थिक गतिविधि लेखापरिक्षण प्रतिवेदन सर्वसम्मतले पास गरेको हो ।कार्यक्रमको प्रमुख अतिथि तिलोत्तमा नगरपालिका वडा नम्बर १ का अध्यक्ष फर्सुराम गिरिले सहकारी ऐनलाई मर्यादित रुपमा कार्यान्वयन गर्न सबै सहकारीहरुलाई आग्रह गर्दै नगरपालिकाले लागू गरेको सहकारी नियमानुसार भन्दा बढि व्याज नलिन आग्रह गरे । उनले दीप ज्योति बचत तथा ऋण सहकारीले गरेको सफलतालाई धन्यवाद दिंदै आगामी दिनमा सञ्चालक, शेयर सदस्य र कर्मचारी तीनै पाटालाई समेटेर अझ उत्कृष्ठ सफलता हासिल गर्न शुभकामना व्यक्त गरे ।
सभामा सञ्चालक समितिको तर्फबाट संस्थाका अध्यक्ष हुमनाथ पाण्डेले आर्थिक वर्ष ०७९/८० को प्रतिवेदन प्रस्तुत गर्दै संस्थाले प्रदान गर्ने सेवा सुविधालाई प्रयोग गर्न र समयमै बचत तथा ऋण ब्याज बुझाउन सबैमा आग्रह गरे । कार्यक्रममा संस्थाका कोषाध्यक्ष नारायण प्रसाद पाण्डेयले आर्थिक प्रतिबेदन, लेखा समिति संयोजक कृष्ण प्रसाद भण्डारीले लेखा समितिको प्रतिबेदन प्रस्तुत गरेका थिए ।
संस्थाले आफ्ना शेयर सदस्यका छाराछोरीहरुलाई ०७९ सालको एसइइ तथा प्लस टुमा सर्वोकृष्ट नतिजा ल्याउने विद्यार्थीलाई सम्मान गरिएको थियो । संस्थामा असल कारोबारी, शेयर वृद्धि गर्ने सदस्य तथा शेयरधनीहरुलाई प्रमाणपत्रसहित सम्मान गरिएको थियो । कार्यक्रममा बोल्दै संस्थाका बरिष्ठ सल्लाहकार दधिराम गौतम, सल्लाहकार रमेश बस्याल, शेयर सदस्यको तर्फबाट ज्योतिमाया थापा र मधुसुदन ज्ञवाली लगायतले बोल्दै संस्थाको भब्य सफलताको कामना गरेका थिए।१६ करोड ८१ लाख १० हजार १ सय १४ रुपैया बराबरको आयव्यय सार्बजनिक गरिएको संस्थाको शेयर पुंजी १ करोड ४७ लाख १९ हजार रहेको छ भने ,जम्मा लगानी १६ करोड ५२ लाख ८६ हजार १ सय ३७ रहेको छ। १ हजार ४३ शेयर सदस्य रहेको संस्थाको कुल मुनाफा २९ लाख ५६ हजार २ सय ४६ रहेको छ । संस्थाका उपाधय्क्ष सन्दिप भट्टराईको स्वागतमा शुरु सो साधारण सभाको संचालन सचिव ललिता क्षेत्रीले गरेकी थिइन्।
कमेन्ट गर्नुहोस्