लुम्बिनी फ्रिडम मिडिया प्रा.लि द्वारा संचालित

जोर्डनसँग नेपाल ३-० ले पराजित,नेपालको राम्रो खेल शुरुवात

IMG
जेष्ठ २५ गते मंगलबार २०७८ तिलोत्तमा सिटी। २०२२ को विश्वकप र २०२३ को एसियन कप छनोट अन्तर्गत समूह बी को खेलमा नेपाल जोर्डनसंग ३-० ले पराजित भएको छ । कुवेतको जाबेर अल अहमद अन्तर्राष्ट्रिय रंगशालमा भएको खेलमा जोर्डनका लागि फैसन सैफ बाहाले दुई तथा याजान अलाभाबले एक गोल गरे ।यसअघि चाइनिज ताइपेईलाई २-० ले पराजित गर्दै आत्मविश्वासी रहेको नेपालले जोर्डन विरुद्ध भने गोल गर्न सकेन ।जोर्डनका लागि फैजलले खेलको २४औं र ४९औं मिनेटमा गोल गरे । उनले पहिलो गोल पेनाल्टीमा गरेका थिए । रोहित चन्दले विपक्षी खेलाडीलाई फाउल गरेपछि प्राप्त पेनाल्टीमा फैजलले गोल गरे । नेपालका कप्तान समेत रहेका गोलकिपर किरणले पेनाल्टी सहि जज गरेपनि गोल बचाउन सकेनन् । पहिलो हाफमा नेपालका कप्तान किरणले केही राम्रा बचाउ गर्दा जोर्डनले गोल अन्तर बढाउन सकेन ।यस्तै फैजलले फ्रिकिकमार्फत व्यक्तिगत दोस्रो गोल गर्दै जोर्डनको अग्रता दोब्बर पारेका थिए । त्यसपछि ६७औं मिनेटमा याजनले हेडरमार्फत  जोर्डनका लागि तेस्रो गोल गरे ।

नेपालका प्रशिक्षक अब्दुल्लाह अलमुताइरीले चाइनिज ताइपेई विरुद्धको खेलमा ३ परिवर्तन गर्दै आज ५ डिफेन्डर खेलाएका थिए । तर विकास खवास आघा घण्टापनि मैदानमा टिक्न सकेनन् र उनलाई मैदान बाहिर ल्याउनुपरेको थियो । उनको स्थानमा सुनिल बल मैदान प्रवेश गरेका थिए ।यस्तै विकास संगै अभिषेक रिजाल र दिनेश राजवंशीले आज पहिलो रोजाईँमा खेलेका थिए ।  दोस्रो हाफमा नवयुग श्रेष्ठ, मनिस डाँगी, विशाल राई र एरिक विष्ट मैदान प्रवेश गरेका थिए ।समूह बी मा नेपालले सातौं खेल खेल्दा यो पाँचौ हार हो । यसअघि २०१९ मा जोर्डनमै भएको खेलमा नेपाल ३-० ले पराजित भएको थियो । यस्तै कुवेत विरुद्ध दुवै खेलमा पराजित भएको नेपाल अष्ट्रेलिया विरुद्ध पनि पराजित भएको थियो । चाइनिज ताइपेई विरुद्ध भने नेपाल दुवै खेलमा विजयी भएको थियो ।७ खेलबाट ६ अंकसहित चौथो स्थानमा रहेको नेपाल अब अष्ट्रेलियासंग खेल्न बाँकी छ ।जोर्डनसंग हारपछि नेपालको एसिया कपको लागि सिधै तेस्रो चरणको प्लेअफ खेल्ने सम्भावना लगभग सकिएको छ । यस्तै कतार विश्वकप २०२२ को छनोटको तेस्रो चरणमा पुग्ने नेपालको सम्भावना अब सकिएको छ ।नेपालले अब २०२३ मा चीनमा हुने एसिया कपका लागि तेस्रो चरण छनोटमा पुग्न प्लेअफ खेल्नुपर्ने लगभग पक्का भएको छ । नेपालले अब जेठ २८ गते छनोटको अन्तिम खेल अष्ट्रेलियासंग खेल्नेछ ।



पेनाल्टी नभएको भए खेलको नतिजा फरक हुन्थ्यो : प्रशिक्षक अलमुताइरी
नेपाली राष्ट्रिय फुटबल टिमका प्रशिक्षक अबदुल्लाह अलमुताइरीले जोर्डन विरुद्ध पेनाल्टी नभएको भए खेलको नतिजा फरक हुन सक्ने प्रतिक्रिया दिएका छन् ।फिफा विश्वकप र एएफसी एसियन कपक छनोट अन्तर्गत जोर्डन विरुद्ध सोमबार ३-० ले पराजित भएपछि प्रशिक्षक अलमुताइरीले पेनाल्टीपछि खेल परिवर्तन भएको प्रतिक्रिया दिएका हुन् । ‘हामीले राम्रो खेल्यौँ । पहिलो हाफमा एउटै गल्ती भनेको पेनाल्टी दिनुभयो । सायद त्यो पेनाल्टी नभएको खेल खेलको नतिजा फरक हुन सक्थ्यो ।’ खेलपछि अलमुताइरीले पोष्ट म्याच कन्फ्रेन्समा भने । त्यसपछि जोर्डनले धेरै आराम पाएर खेल्यो र गोल थपे ।’उनले हारपछि खेलाडीलाई दोष नदिन र धैर्य गर्न फेरी भने । ‘खेलाडीलाई दोष नदिनुस् । उनीहरु भर्खर रियल फुटबल खेल्दैछन् । हामीले आफ्नो उत्कृष्ट प्रदर्शन गरेका हौँ ।’ उनले भने । ‘आगामी खेलमा सुधारिएको प्रदर्शनको आशा छ ।’

कमेन्ट गर्नुहोस्