तिलोत्तमामा ‘आहा रेष्टुरेन्ट एण्ड क्याफे’ शुभारम्भ

जानकीनगर। रुपन्देहीमा लामो समयदेखी होटल ब्यवसाय गर्दै आएका राम बहादुर न्यौपानेले तिलोत्तमा नगरपालिका–३ विष्णुपुरमा ‘आहा रेष्टुरेन्ट एण्ड क्याफे’ सञ्चालनमा ल्याएका छन । बजारको माग अनुसार उनले सुविधासहितको रेष्टुरेन्ट सञ्चालनमा ल्याएका हुन् । शुक्रबार एक कार्यक्रमका बिच रेष्टुरेन्टको उद्घाटन गर्दै तिलोत्तमा नगरपालिकाका नगरप्रमुख रामकृष्ण खाणले मुलुकको अर्थतन्त्र चलायमान बनाउन होटल तथा रेष्टुरेन्ट व्यवसायको महत्वपूर्ण भूमिका रहेको बताए । होटल व्यवसायमा हजारौँ युवाले रोजगारी पाएको हुदा पनि यसलाई सरकारबाट सहजिकरण गर्ने प्रतिवद्धता जनाए । ‘यस क्षेत्रको विकासले रोजगारी सिर्जनासँगै स्थानीय अर्थतन्त्रलाई समेत चलायमान बनाउन सहयोग गरेको छ ।’– उनले भने । होटल तथा रेष्टुरेन्ट व्यवसायलाई २४ सै घण्टा सञ्चालन गर्न सकिने वातावरण बनाउनुपर्ने उनले जोड दिए । ग्राहकलाई अनावश्यक दुःख दिने गरी होटल तथा रेष्टुरेन्टमा प्रहरीबाट छापा मार्ने प्रवृत्ति अन्त्य हुनुपर्ने उनको भनाइ थियो । तिलोत्तमा नगरपालिका होटल तथा रेष्टुरेन्टसहित समग्र पर्यटन व्यवसायीको साथमा रहेको बताउँदै प्रमुख खाणले व्यवसाय प्रवद्र्धनका लागि आगामी दिनमा पनि नगरपालिकाबाट आवश्यक सहयोग गर्ने प्रतिबद्धता जनाए ।

तिलोत्तमा क्षेत्रमा पछिल्लो समय बढ्दै गएको सहरीकरणसँगै खानपिन तथा मनोरञ्जनका लागि नयाँ गन्तव्यको माग बढिरहेको अवस्थामा गुणस्तरीय सेवा दिने उद्देश्यले रेष्टुरेन्ट सञ्चालनमा ल्याइएको सञ्चालक न्यौपानेले बताए । ग्राहकको आवश्यकता र सुविधालाई प्राथमिकतामा राखेर सेवा प्रदान गर्ने उनले बताए । ‘होटल व्यवसायमा लामो समयको अनुभव छ । त्यही अनुभवलाई नयाँ अवधारणा र व्यवस्थापनसँग जोडेर ग्राहकलाई गुणस्तरीय सेवा दिने उद्देश्यले रेष्टुरेन्ट सञ्चालनमा ल्याएका हौँ,’ सञ्चालक न्यौपानेले भने, ‘ग्राहकको सन्तुष्टिलाई पहिलो प्राथमिकतामा राखेर स्वादिलो रैथाने खाना, राम्रो वातावरण र सहज सेवा प्रदान गर्ने हाम्रो प्रयास हुनेछ ।’

एक कठ्ठा क्षेत्रफलमा निर्माण गरिएको रेष्टुरेन्टमा खानाका परिकारमा विविधता, ग्राहकको सुविधा र आवश्यकतालाई ध्यानमा राख्दै विभिन्न संरचना तथा सेवा सुविधा उपलब्ध गराइएको छ । रेष्टुरेन्टमा विभिन्न कार्यक्रम आयोजना गर्न सकिने सुविधासम्पन्न हल, तीन वटा क्याविन र तीन वटा कटेजको व्यवस्था गरिएको छ ।गाउँको रैथाने खानाका परिकारलाई प्राथमिकता दिँदै स्वाद, गुणस्तर र आतिथ्यलाई व्यवसायको मुख्य आधार बनाउने सञ्चालक न्यौपानेले बताए । रेष्टुरेन्टमा रैथाने खाना, लोकल चिकन, मटनलगायतका विभिन्न स्वादिष्ट परिकारका साथै खाजाका विभिन्न आइटम उपलब्ध छन् । ग्राहकको रुचिअनुसार खानाका परिकार छनोट गर्न सक्ने गरी मेनु तयार गरिएको सञ्चालक न्यौपानेले बताए । उनका अनुसार रेष्टुरेन्टमा खानाका परिकारको स्वाद र गुणस्तरसँगै स्वच्छता, सरसफाइ र ग्राहकको सेवामा विशेष ध्यान दिइएको छ । पारिवारिक वातावरणमा खानपिन गर्न चाहने ग्राहकदेखि साथीभाइको भेटघाट तथा विभिन्न कार्यक्रमका लागि समेत रेष्टुरेन्ट उपयुक्त हुने उनले बताए ।

रेष्टुरेन्टमा जन्मदिन, सामान्य पार्टी, पारिवारिक जमघट, बैठक तथा अन्य सामाजिक कार्यक्रम गर्न सकिने व्यवस्था गरिएको छ । कार्यक्रमका लागि छुट्टै हल तथा खुला वातावरणमा कटेजको समेत व्यवस्था भएकाले ग्राहकले आफ्नो आवश्यकता र रुचिअनुसार स्थान प्रयोग गर्न सक्नेछन् । आगामी दिनमा ग्राहकको सुझाव र मागका आधारमा सेवा तथा परिकार थप गर्दै लैजाने उनले जनाए ।

यस्तै कार्यक्रममा होटल तथा रेष्टुरेन्ट व्यवसायी संघ रुपन्देहीका अध्यक्ष माधवकुमार खनालले व्यवसायीले लगानी गरेअनुसारको प्रतिफल पाउन नसक्दा व्यवसायबाट पलायन हुनेक्रम बढीरहेको बताए । तिलोत्तमा क्षेत्रमा पर्यटन व्यवसायीहरूले अर्बौं लगानी गरेको बताउँदै उनले राज्यले व्यवसायीमैत्री वातावरण सिर्जना गरेर स्वदेशमै उद्यम गरी हजारौँ यूवालाई रोजगारी सिर्जना गरेका व्यवसायीहरुलाई पलायन हुनबाट रोक्नुपर्ने बताए । रूपन्देहीमा २ हजार ५ सय होटल तथा रेष्टुरेन्ट सञ्चालनमा रहेको अध्यक्ष खनालले बताए । होटल तथा रेष्टुरेन्ट व्यवसायी संघ रूपन्देहीका सल्लाहकार समुन्द्र जिसीले रेष्टुरेन्टले नाम अनुसारको स्वाद र सेवा प्रदान गरी ग्राहकको मन जित्ने विश्वास व्यक्त गरे । कार्यक्रममा संघका महासचिव केशवराज कंडेल लगायतले बोल्दै व्यवसायीक सफलताको शुभकामना व्यक्त गरे । हाल रेष्टुरेन्टमा ८ जनाले प्रत्यक्ष रोजगारी पाएका छन् ।