छोरालाई असल मानव बनाउ आमा

मेरो छोरा डाक्टर हो

मेरो छोरा पाइलट हो

अनि

मेरो छोरा इन्जिनियर हो

भन्नु भन्दा पहिला

मेरो छोरा असल मानव हो

भन्न सक्ने बनाउ आमा।

……………………………………..

बिरामीको उपचार भन्दा पहिले

सात गाउँ राखेर ल्याएको श्रीमतीलाई

गाइ गोरुलार्ई जस्तो कुटपिट गर्न

पाईंदैन भन्ने नैतिक शिक्षाको स्टेथेस्कोप

छोरालाई घाँटीमा झुन्डाइदेउ आमा।।

……………………………………..

आकाशमा प्लेन उडाउन भन्दा पहिले

सात फेर जगिया घुमेर ल्याको श्रीमतीलाई

अँधेरो कुनाभित्र थिलथिलायर, उज्यालोमा

पखेटा फिजाउँदै उडेको चरी चियाउने बनाउन

पाईंदैन भन्ने, नैतिक शिक्षाको टोपि

छोरालाई सिरबाट नखस्ने गरि लगाइदेउ आमा।

…………………………………..

घरको नक्सा कोर्नु भन्दा पहिले

सात जुनि सँगै हुने मन्त्र पढेर ल्याएको श्रीमतीलाई

शरीरको बनावट परिवर्तन हुँदैमा, एकै सालमा

सम्बन्धको हिसाब किताब

बिगार्न पाइदैन भन्ने, नैतिक शिक्षाको गणित

छोरालाइ डिसटिङ्सनमा पास हुने गरी पढाइदेउआमा।

……………………………………..

छोरा डाक्टर, पाइलट अनि इन्जिनियर

हो भन्न भन्दा पहिला

एक असल मानव हो भनि नाक फुलाउ आमा।

……………………………………..

कसैका छोरी बढि, भयर तिम्रो छोरालाई

सुम्पिएका हैनन आमा

छोरा डाक्टर हो भन्दैमा

बिरामी नभएका बुहारीलाई

दबै मलम लाउन पर्ने गरी नकुट आमा ।

……………………………………..

छोरा पाइलट हो भन्दैमा

स्वतन्त्रले उडेर आफ्नो संसार खोजेकी बुहारीलाई

छोराको खुट्टामा झुन्डिएर उड्ने नबनाउ आमा।

……………………………………..

छोरा इन्जिनियर हो भन्दैमा

आफै आत्मनिर्भर भएर पिल्लर बनेकी बुहारीलाई

नक्सा नमिलेको घरको पर्खाल नबनाउ आमा।

……………………………………..

पहिले छोरालाई

असल मानव भएर

मानवीय व्यवहार कसरी गरिन्छ भन्ने

नैतिक शिक्षाको पाठ पढाउ आमा

छोरी चेली जोगाउनु छ भने

छोरालाई असल मानव बनाउ आमा

छोरालाई असल मानव बनाउ आमा।

-अनुसा आचार्य