लुम्बिनी फ्रिडम मिडिया प्रा.लि द्वारा संचालित
प्रा. डा. कपिल लामिछाने
२०७८ फागुन ६, तिलोत्तमा सिटी।
पहिले:-
सगोलको ठुलो परिवार थियो । सुविधा कम र असुविधा बढी थिए । पढालेखा र समझदार भएकाले एकदिन उसले प्रस्ट शब्दमा आफू छुट्टै बस्न चाहेको कुरा राख्यो । धेरैले जिब्रो टोके ।
– ओह, तैँले छुट्टिने कुरा गरिस् !?
– तँ छुट्टिने ? रामराम कस्ता जमाना आए !
– धत् पाजी, बाआमा, दाजुभाउजू सबैका मुखेन्जी यस्तो कुरा गर्दा लाज लागेन तँलाई ?
– कत्ति छटाको हँ ?
अहिले:-
एकदिन पुराना साथीहरू भेट भए । कुरैकुरैमा ऊ सगोलमै भएको कुरा भयो । साथीहरू छक्क परे । उनीहरूले प्रश्नका झटारा हाने । भने–
– आबुई तँ सगोलमै छस् ?
– त्यत्रो ठुलो परिवारमा कसरी तेरो प्रगति हुन्छ ?
– कसरी तेरो प्राइवेसी रहन्छ ?
– तँ कसरी बाँचेको छस् ?
– खै मैले त पत्याइन बा । ढाँटेको होलास् ।
कमेन्ट गर्नुहोस्