नतिजा प्रकाशनमा ढिलो नगर्न त्रिविलाई शिक्षामन्त्रीको निर्देशन

२०७८ माघ ११, तिलोत्तमा सिटी। शिक्षा, विज्ञान तथा प्रविधिमन्त्री देवेन्द्र पौडेलले बाँकी रहेका विषयका परीक्षाको नतिजा ढिलो नगर्न त्रिविलाई  निर्देशन दिनुभएको छ । त्रिभुवन विश्वविद्यालयले लिएको परीक्षाको नतिजा प्रकाशित गर्न ढिलाइ भइरहेको गुनासो आइरहेका बेला मन्त्री पौडेलले बाँकी रहेका विषयका परीक्षाको नतिजा तत्काल प्रकाशित गर्न परीक्षा नियन्त्रण कार्यालयका पदाधिकारीहरूलाई निर्देशन दिनुभएको हो । 

आज मङ्गलवार बल्खुमा रहेकाे परीक्षा नियन्त्रण कार्यालयको अनुगमन गर्न पुग्नुभएका उहाँले विद्यार्थीले चाहेका बेलामा नतिजा प्रकाशित गर्ने व्यवस्था अपनाउन पनि त्यहाँका पदाधिकारीहरूलाई सचेत गराउनुभयो । मन्त्री पौडेलले परीक्षा नियन्त्रण कार्यालयको प्रणालीमा सुधार गर्न आफू तयार रहेको तर जनशक्तिकै अभाव देखाएर परीक्षाको नतिजा प्रकाशित गर्ने काममा ढिलाइ गर्न नहुने स्पष्ट पार्नुभयो । 

मन्त्री पौडेलले भन्नुभयो, ‘जेसुकै तर्क गरे पनि रिजल्ट ढिलो भएको कुरा प्रमाणित छ । जनशक्ति कम भएको हुँदा काममा ढिलाइ भएको यहाँका कर्मचारीहरूले भनेका छन् । यसलाई सुधार्ने प्रसङ्गमा अर्को प्रणाली अपनाऔँला तर अहिले नै भएको जनशक्तिबाट छिटोभन्दा छिटो रिजल्ट निकाल्ने काम अघि बढाउनुस् भनेका छौँ । विद्यार्थीको गुनासो अनुसार कर्मचारी पुगेन, प्रणाली पुगेन भन्ने कुराले मिल्दैन । विद्यार्थीले चाहेका बेलामा रिजल्ट दिन सक्नुपर्छ विश्वविद्यालयले । त्यो व्यवस्था गर्नुस् भनेको छु । 

परीक्षा नियन्त्रक पुष्पराज जोशीले जनशक्ति अभावका कारण परीक्षाको नतिजा प्रकाशित गर्न ढिलाइ भएको जवाफ मन्त्री पौडेललाई दिनुभएको थियो । उहाँले जनशक्तिको अभाव र विश्वविद्यालय अन्तर्गतका विद्यार्थीको सङ्ख्या बढी भएकाले परीक्षाको नतिजा प्रकशित गर्ने काममा ढिलाइ हुन गएको कुरा आफूले मन्त्री पौडेललाई जानकारी गराएको बताउनुभयो । उहाँले यस विश्वविद्यालयको समग्र पुनर्संरचना गरेर अघि बढ्नुपर्ने योजना सुनाउँदै त्यसका लागि प्रधानमन्त्री शेरबहादुर देउवासँग छिट्टै परामर्श गरेर अघि बढ्ने पनि बताउनुभयो ।