लुम्बिनी फ्रिडम मिडिया प्रा.लि द्वारा संचालित

मेरा बा - इश्वर पोख्रेल

IMG
( आज विहानै छोराहरूले ‘बा को मुख हेर्ने दिन’ भनेर निधारमा रातो टिका लगाइदिए ।
मैले भने मेरा दिवंगत बा लाई सम्झिरहें !)
............................
मैले मेरा बा खोज्न -
धेरै पटक आफ्ना दिमागका आँखा मिचे, 
आँखा चिम्म पारेर प...र  प...र  हेर्न खोजे ..!।
चम्किरहेका ताराहरू र चहकिलो जून नियालें ,
कहिले निष्पट्ट अध्यारो रातमा बाटो काट्दै गर्दा 
आफै अगाडि ठिंग उभिन आइपुगेको,
सलवलाउँदै गरेको - बग्दैगरेको 
कालो आकृतिको सामना गरें !
तर अहँ ...
बा लाई सग्लो आकारमा भने 
देख्न सकिन / पाउन सकिन 
मेरा बा सँधै धमिलो आकृतिमा 
मेरा अगाडि उभिई रहनुभो- आइरहनुभो !
त्यही धमिलो आकृति - मेरो बाको आकृति !
अघाउजी हेर्न खोज्छु - ठम्याउन खोज्छु 
तर दुर्भाग्य ! देख्नै सक्तिन - ठम्याउनै सक्तिन 
सल्वलाउँदै गरेको- बग्दैगरेको 
धमिलो / कालो आकृति 
मेरो बा बनेर 
सँधै सँधै मेरा अगाडि ठिंग उभिन आइपुग्छ !
मेरा बा - 
मैले तपाईंलाई सँधै सँधै यसरी नै भेट्दै आएकोछु !
बालखै उमेरमा, 
मृत्यु शैय्यामा लमतन्न परेको 
बाको शरिरलाई अहिले पनि सम्झन्छु ! 
भक्कानिएर रूँदैगरेकी मेरी आमाको सारीको सप्कोले मुख छोप्दै 
बा लाई त्यसवेला नियालेको थिएँ -
म, आमा झैं डाको छोडी रोएको त थिइन - 
तर रून खोज्दै र रून्चे अनुहार लगाएर बा को अनुहार हेरेको थिएँ - 
दीर्घ रोगी बनेर गलिसकेको ,
अस्वभाविक रूपले कालो बनिसकेको अनुहार ,
वेस्सरी तील चामल बनिसकेका लामा लामा 
दारी जुंगाहरू , 
वेस्सरी धस्सिएका आँखा ,
हो- मैले तपाईंलाई त्यही रूपमा देखें - मेरा बा!
उत्तरार्धतर्फ बढिरहेको म,
अहिले पनि ,लगातार बा लाई देख्ने - भेट्ने धोकोमै छु ।
तर , सँधै सँधै त्यही र त्यस्तै 
कालो कालो , धमिलो धमिलो आकृति 
मेरो बा बनेर ठिंग्ग उभिने गरेको छ , 
म निरन्तर निरन्तर बा को खोजीमा छु,
जति धमिलो देखिए पनि 
बा लाई देख्ने - भेट्ने प्रयत्न 
जारी छ - जारी रहनेछ !
बा !
तपाईंलाई देख्ने , अघाउँजी हेर्ने
मेरो अखण्डित धोको मरेको छैन- जारी छ !

कमेन्ट गर्नुहोस्