देवदहको केरवानी माविमा विद्यार्थीलाई यातना, छात्रा घाइते

तिलोत्तमा  चैत्र १३। देवदहको केरवानी माध्यमिक विद्यालयमा एक शिक्षिकाले विद्यार्थीलाई क्रुर यातना दिंदा एक छात्रा घाइते भएकी छन । कक्षा ७ मा अध्ययनरत १४ वर्षीया एक बिद्यार्थीलाई पेशा बिषयकी शिक्षिका साहारा दाहालले प्रश्न सोध्दा उत्तर दिन नसकेको भन्दै उनीमाथि कुटपिट भएको हो । “मिसले मलाई ५ पटक भन्दा बढी लौरोले कुट्नु भयो । मेरो हात सुन्निएको थियो र मैले मिस दुख्यो भनें । तर उहाँले नाटक गर्छेस भन्दै झन पिट्नु भयो ।” पीडा मिश्रीत श्वरमा ती विद्यार्थीले भनिन । आफुलाइ सहनै नसक्ने गरि दुखिरहेको बताउंदै उनले त्यस प्रकारको कुटपिट अन्य विद्यार्थीमाथी पनि भएको र हुने गरेको बताइन।’

पिडित विद्यार्थीले बताए अनुसार उनको हातमा निलडाम देख्न सकिन्छ र हातको एउटा औंला चलको छैन । यस बिषयमा केरवानी बिद्यालयका प्रधानाध्यापक दुर्गादत्त शर्मासंग कुरा गर्दा उनले आफू बिद्यालयमा नरहेको र काजमा जनगणना कार्यमा खटिएकोले घटनाबारे जानकारी नभएको बताए । प्राध्यापक शर्माले घटनाबारे विद्यालयका अर्का जिम्मेवार शिक्षक हरि पाण्डेसंग बुझ्न अनुरोध गरेपछी शिक्षक पाण्डेले सो घटना भएको स्विकार गर्दै शिक्षिकालाई अबका दिनमा यसप्रकारका क्रियाकलाप नदोहोर्‍याउन सचेत गराएको बताए ।