एन–प्याब्सनद्वारा रुपन्देही स्तरीय चित्रकला प्रतियोगिता

भलवारी। राष्ट्रिय निजी तथा आवासीय विद्यालय अर्गनाइजेशन, एन–प्याब्सनको आयोजनामा रुपन्देही जिल्लास्तरीय चित्रकला प्रतियोगिता सम्पन्न भएको छ । तिलोत्तमा–७, भलवारीस्थित सेन्ट जोसेफ इङ्ग्लिश हाईस्कुलमा आयोजित प्रतियोगितामा जिल्लाका १४ विद्यालय सहभागी थिए । प्रतियोगिताको सिनियरतर्फ ग्लोरी बोर्डिङ स्कुलकी आराध्या निसाद प्रथम, देवदह इङ्ग्लिश बोर्डिङ स्कुलकी सुदीक्षा श्रेष्ठ द्वितीय, बुटवल ग्लोरीकी शिक्षा राना तृतीय तथा सिद्धार्थ ग्यालेक्सी पब्लिककी मंजिला श्रीस सान्त्वना हुनुभयो ।

जुनियरतर्फ देवदह बोर्डिङ स्कुलका साइमन थापा प्रथम, नमूना एभरग्रीन इङ्ग्लिश बोर्डिङ स्कुलका कृष कलवार द्वितीय, सिद्धि चिल्ड्रेन एकेडेमीकी कुसुम कुँवर तृतीय तथा लाइफ क्रिएशन एकेडेमीकी कृतिका यादव सान्त्वना हुनुभयो । सिनियर र जुनिायर दुवै समूहका विजेतालाई क्रमशः ४ हजार, ३ हजार, २ हजार र १ हजार रुपैयाँ नगदसहित शिल्ड, मेडल र प्रमाणपत्र प्रदान गरिएको थियो ।यसअघि प्रतियोगिताको उद्घाटन गर्दै तिलोत्तमा नगरपालिका उपप्रमुख तथा प्रमुख अतिथि जगेश्वरदेवी चौधरीले यसखाले प्रतियोगिताले विद्यार्थीको सिर्जनशीलता, आत्मअनुशासन, लगनशीलता र अतिरिक्त प्रतिभा प्रस्फुटनमा महत्वपूर्ण योगदान पुग्ने बताउनुभयो । उहाँले आगामी दिनमा पनि विद्यार्थी लक्षित कार्यक्रम आयोजना गर्न आयोजकलाई आग्रह गर्नुभयो ।

एन–प्याब्सनका कार्यबहाक अध्यक्ष अमित यादवको अध्यक्षतामा सम्पन्न कार्यक्रममा एन–प्याब्सनका केन्द्रीय सदस्य दिलप्रसाद गुरुङ, कार्यक्रम संयोजक लक्ष्मण अर्याललगायतले शुभकामना व्यक्त गर्नुभएको थियो । प्रतियोगितामा जुनियरतर्फ कक्षा १ देखि ५ सम्मका विद्यार्थीले ‘मेरो सपनाको विद्यालय’ र कक्षा ६ देखि १० सम्मकाले ‘वातावरणीय स्वच्छता’ विषयमा चित्र कोरेका थिए ।