नेपाल एसियन कप छनोटको तेस्रो चरणमा, प्लेअफ खेल्न नपर्ने

असार २ गते बुधबार २०७८ तिलोत्तमा सिटी।सन् २०२३ मा चीनमा आयोजना हुने एसियन कप प्रतियोगिताको लागि नेपालले सिधै तेस्रो चरणमा स्थान पक्का गरेको छ ।एसियाली फुटबल महासंघ (एएफसी)ले छनोट प्रक्रिया परिमार्जन गरेसँगै नेपालले ‘प्लेअफ’ खेल नखेलि सोझै तेस्रो चरणको खेल खेल्न पाउने भएको छ । एसियन कप आयोजना गर्ने राष्ट्र ‘चीन’ तथा विश्वकप २०२२ आयोजना गर्ने साविक एसियन कप विजेता ‘कतार’ले स्वतह एसियन कप छनोटमा स्थान बनाउँदा विश्वकप छनोटको दोस्रो चरणको समूह खेलमा चौथो स्थानमा रहन सफल टोलीले पनि ‘प्लेअफ’ खेल्नु नपर्ने भएको ‘एएफसी’ले जनाएको छ ।

त्यस्तै दोस्रो चरणको विश्वकप छनोटमा पाँचौं स्थान हासिल गर्ने शीर्ष तीन टोलीलाई पनि ‘एएफसी’ले एसियन कपमा सिधै तेस्रो चरणमा स्थान दिएको छ । अब पाँचौं स्थानमा रहेका पनि चार पुछारका टोलीले मात्र ‘प्लेअफ’ खेल खेल्ने छन् ।‘प्लेअफ’ खेल्ने राष्ट्रमा चाइनिज ताइपेइ, इन्डोनेसिया, कम्बोडिया र गुवाम परेका छन् । यस अघि ‘एएफसी’को समीक्षा अनुसार दोस्रो चरणको विश्वकप छनोटमा चौथो स्थान प्राप्त गर्ने टोलीले पनि ‘प्लेअफ’ खेल्नु पर्ने नियम थियो । त्यसो हुँदा एसियन कप २०२३ को लागि नेपालको ‘प्लेअफ’को झिनो आशा मात्र बाँकी रहेको थियो ।एसियन कप २०२३ चीनमा जुन १६ देखि जुलाई १६ सम्म आयोजना हुने कार्यक्रम रहेको छ । त्यस्तै ‘प्लेअफ’का खेलहरु आगामी सेप्टेम्बर ७ र अक्टोबर १२ मा दुई लेगको खेलमा सम्पन्न हुनेछन् ।